NM 1125 - maː teːləm jelpiŋ moːjt

Text + Metadata Translation

Original Title	Dialect	Informant	Genre Form	Genre Content	ID	glossed	Audio
maː teːləm jelpiŋ moːjt	northern mansi (NM)	Volkop, Ilja Jakorop (= Saren-saːxiŋ oːjka)	prose (pro)	Mythological Texts (myt)	1125	–	–

Text Source	Editor	Collector
Munkácsi, Bernát (1892–1902): "Vogul népköltési gyűjtemény. I. kötet. Regék és énekek a világ teremtéséről". Budapest: Magyar Tudományos Akadémia, pp. 1-32.	Munkácsi, Bernát	Munkácsi, Bernát (MU)

English Translation	German Translation	Russian Translation	Hungarian Translation
"Sacred Tale of the Origin of the World"	–	–	"A föld keletkezésének szent regéje"

Citation
Munkácsi, Bernát: OUDB Northern Mansi Corpus. Text ID 1125. Ed. by Janda, Gwen Eva. http://www.oudb.gwi.uni-muenchen.de/?cit=1125 (Accessed on 2024-04-29)

maː teːləm jelpiŋ moːjt

1.

tunra-sʲaxl eːkʷaɣ oːjkaɣ oːleɣ. akʷ jaːŋk xulax oːnʲsʲeɣ. kʷol kitpaːl nuːpəl akʷ-muːs wit; maː aːtʲim. oːjka kʷona at kʷaːli, kʷoni maː mat-xurip at waːɣte. tox oːlimateːn akʷ-mat-eːrt numi toːrəmnəl matər kuritanə sujti. oːjka isnasnəl kʷonalʲ sunsi, numəl toːrəmnəl keːr-taxt ti jiw, maː kinsuŋkʷə witən juː ta sʲaltəs. ta jaləs, ta jaləs, noːŋxa neːɣləs, neː-matər maː at xoːntəs. liltəs, liltəs, witən oːs jola sʲaltəs. jaləs, jaləs, noːŋx neːɣləs; oːs wunʲsʲalʲ, maː aːtʲim. mosʲ liltəs, xu͏ːrmitiɣ sʲaltəs, noːŋx neːɣlmate tur joli paːlt taːra lilasame, nʲolat maːnʲ maː-tawrikʷə. tiːɣlamləs, tuːl toːrəm nuːpəl ta minəs.

2.

eːkʷaɣ oːjkaɣ jol-xujəsiɣ. xolit kʷaːlmeːnt toːrəmnəl oːs matər kuritanə sujti. oːjka kʷonalʲ kʷoss sunsi, toːrəmnəl jola keːr-loːliɣ jiw, witnə juː sʲalti. jaləs, jaləs, noːŋxalʲ neːɣlmat neː-matər aːtʲim, wonʲsʲalʲ. mosʲ liltəs, liltəs, oːs witnə sʲaltəs. oːs jaləs, jaləs, noːŋxalʲ neːɣlmat, oːs neː-matər aːtʲim. mosʲ liltəs, xuːrmitiɣ oːs sʲaltəs. noːŋxalʲ neːɣlmat puŋk-pattaoːs taːra-lilasame, nʲolat joməs janit maː-lomtkʷə lʲuːlʲi. anʲ tunra-sʲaxl-kʷol-saːmnə nʲole tuː saːrtəmteːste, tuːl toːrəm nuːpəl ta tiːɣlamləs.

3.

eːkʷaɣ oːjkaɣ jol-xujəsiɣ. xolit kʷaːlmeːnt maː laɣəl-keːr paːŋx-witiɣ jeːmtəm. kitit xoːtəl kʷaːlmeːnt maː naːŋkə pasnə ta joxtəm, ta-keːm ta janiɣməm. xuːrmit xoːtəl eːkʷaɣ oːjkaɣ isnasnəl kʷonalʲ kʷoss sunseɣ wit aːtʲim, akʷ-muːs maːɣ ta jeːmtəm. jaːŋk xulaxe nuːpəl oːjka laːwi: ”jalən sar, sunsən, maː man janitiɣ jeːmtəm?” xulax minəs, akʷ sʲossup jaləs, maː ta janitiɣ ta jeːmtəm. eːkʷaɣ oːjkaɣ oːs xujesiɣ, oːs kʷaːlsiɣ. jaːŋk xulax maː janite sunsuŋkʷə oːs keːtiteːn. jaːŋk xulax minəm maːtet xoːtəl-jaːt usʲ ta joxts; maː ta janitiɣ ta jeːmtəm. xuːrmit xoːtəl kʷaːlsiɣ, xulax nuːpəl oːs laːweɣ: ”jalən sar, sunsən, maː man janitiɣ jeːmts!” minəm maːtet akʷaɣ aːtʲim, xoːtəl tox eːtʲiməs. jol-xujnə oːrəmt jaːŋk xulax seːməliɣ jeːmtimə, usʲ ti joxtəs. oːjka xulaxe nuːpəl laːwi: ”naŋ jalnə maːnt matər ti waːrsən!” - xulax laːwi: am manər waːrsəm?! akʷ eːləm-xoləs sorəmnə patəm, am tuːl teːsəm, toːna am seːməliɣ jeːmtsəm.” - ”xuːnʲ eːləm-xoləs teːsən, akʷ paːlnə minən! eːləm-xoləs jisiŋ toːrəm uːnti-pəl, eːləm-xoləs notiŋ toːrəm uːnti-pəl naŋ naŋki woːr-uj aluŋkʷə ul weːrmən, wit-xul aluŋkʷə ul weːrmən; eːləm-xoləs aləm mat woːr-uj kelpiŋ kant simən leːstəlaln; ta xoːtəl teːtal xujən!” xulax woːrnə ti minəs, anʲiŋən xoːtəliŋən tot ti oːli.

4.

anʲ tunra-sʲaxl-kʷolenəl eːkʷa kʷona kʷaːli. juː sʲaltimate oːjkate nuːpəl laːwi: “oːjka, kʷol-sistə akʷ jiw-saw teːləm.” oːjkate laːwi: “taːre xumlʲə oːls, towe xumlʲe oːls, juː tuːleln!” anʲ jiw eːkʷaten xilwəs, juː tuːlwəs, anʲ oːjkaten xasʲsawə: anʲ-manʲ ulʲpa. eːkʷate nuːpəl laːwi: “kʷona kʷaːlteln, akʷ tuː tusʲteln!” oːjkate takʷi akʷ-muːs kʷona at kʷaːləlaːli. eːkʷateːntəl jol xujəsiɣ, noːŋx kʷaːlmat eːkʷate aːtʲim. xotalʲ minəs, man-as oːli; oːjka kʷona at kʷaːli, eːlalʲ toxa-ta oːli. tox oːlimat nʲiləx-atəx saːt keːmiɣ ti jeːmtəs, ti marsʲimawəs. at kʷoss kʷon kʷaːluŋkʷə roːwi, ti xoːtəl eːkʷate kinsuŋkʷə kʷona ti kʷaːli. aːwisuːntnə minəs; eːkʷate kʷon sujti, laːwi: “ul kʷaːlən! am piːɣrisʲ oːnʲsʲeɣəm, am piːɣrisʲəm leːɣən alnə janitiɣ ti jeːmts, am saːt-keːməl juː ti joxteɣəm, naŋ ul kʷaːlən kʷon!” saːt-keːm kʷon ta oːləs, tuːl eːkʷa piːɣrisʲeːntəl juː ti sʲaltsiɣ. piːɣrisʲe xajtiɣtənə janitiɣ jeːmtəm.

5.

eːriɣ xum, moːjt-xum mana xosa janiɣmi?! eːkʷaɣ oːjkaɣ eːla xoːleɣ, eːla oːleɣ. piːɣrisʲeːn woːr-uj alnə janitiɣ jeːmti. ossiɣ-jiw-simnəl jowtəl waːrəsteːn, ossiɣ-jiw-simnəl nʲaːləl waːrəsteːn; witiŋ paːl, woːriŋ paːl alisʲlaŋkʷə ti pats. oːjkate laːwi: ”piːɣmeːn manər naməl piniləmeːn?” - eːkʷate laːwi: “aːɣirisʲ ke oːlnuː, am namtnuwləm, xum-nʲawrəm ul aːsʲen namtuwə!” - oːjkate laːwi: “am manər naməl piniləm?! name ti woss oːli: Tari-peːsʲ-nʲimaːlʲe-sow.

6.

tari-peːsʲ-nʲimaːlʲe-sow woːrnə ti mini. uriŋ paːl saw suːmjəx taɣintəpti, woːriŋ paːl saw suːmjəx taɣintəpti; nʲoxsiɣ ujiɣ ness rawpeɣ. tox jalimat wit ajuŋkʷə taxmejəs. akʷ maːt paliɣ owtnə jaːn ti xoːntxats; witen ajuŋkʷə xujəs. tusiŋ oːjkan lʲalʲt-aːŋkʷatawəs. noːŋx-roxtəs. ”ti mat kulʲiŋ jaː teːl!” - laːwi - ”kulʲ oːnsʲi, wit ajuŋkʷə tit at roːwi.” tuːl minəs, tuːr-jaːŋk saɣrəs, wit ajuŋkʷə oːs xomi xujəs. tusiŋ oːjkan oːs lʲalʲt-aːŋkʷatawə. oːs laːwi: “ti kulʲiŋ mat tuːr oːlnete!” tuːl aːsən minəs. aːs-kʷotʲlən pasats, witen xomi xujəs, tusiŋ oːjkan oːs lʲalʲt-aːŋkʷatawə. tiɣl maːleji, takʷi tuse is-xore lʲalʲt-aːŋkʷati. aːs-witnəl ajəs, tuːl juː ta minəs. juː sʲaltəs, lowəsʲnə uːntəs: suːp aːtʲim, nʲelm aːtʲim. sʲaːnʲen ta-kʷoss kitilawə, akʷ-muːs at potərti. sʲaːnʲe laːwi: “at ke potərteɣən, xuːnʲtə matər naknə pateɣən: jol ul joxtən, noːŋx ul joxtən!” aːsʲe laːwi: “naŋ suːp-nʲelmtal uːntsən; meːn nuːpələmeːn lʲuːlʲ nomt oːnʲsʲəɣən?” piːɣe usʲ ti laːwi: “am tusəm ti janitiɣ jemtme sis neː minəm neːɣiŋ saːm at ta waːmən?” - aːsʲe laːwi: “am kʷon at kʷaːleɣəm, neː minnə neːɣiŋ saːm xot oːli, am at waːɣləm; naŋ maː joːŋxnə xum, wit joːŋxnə xum, neː minnə neːɣiŋ saːm naŋki ta kinseɣən.”

7.

tari-peːsʲ-nʲimaːlʲe-sow puŋke, same manʲiɣtəste, jola xujəs. xolit kʷaːləs; aːsʲe laːwi: “jol-rawpəm luː-kʷol-saːmnə minən, xilən. matər pireɣən: ta pireɣən, at ke pireɣən: at ta pireɣən.” piːɣ ta kʷaːləs, anʲ rawpəm luːkʷol-saːmnə ta minəs. anʲ luː-lʲuːlʲ xilxatuŋkʷə pats, sʲeːrmatkʷaːliɣ-awl ti neːɣləs. anʲ sʲeːrmat-kʷaːliɣ-awl ti puːwəste, kʷona ti xartəste: ta mors luː oləm, xoːluŋkʷə ti jeːmtəm, tiːɣlʲe-tuːlʲə ness poɣəraːli. kʷoss-keːrnʲaːləl samiɣ xalt patəmtəste, lilasame-muːs akʷ paːl nʲol-sam-asenəl suːltmel pajalts, akʷ paːl nʲol-sam-asenəl posiməl paːjalts. xuːrəm tal luwiɣ jeːmts. luwe sisən noːŋx ta poriɣməs, noːŋx ta lapejəmtuwəs. minnə tul, xajtnə tul xalən teːliɣtawəs.

8.

luwe sis-tarməl tox minimate anʲ tari-peːsʲ-nʲimaːlʲe-sow aːsən neːɣləs. aːs-waːtat nʲuːlʲtaŋ minimate, nʲultaŋ-puŋkət xuːrəm xaːpɣa lʲuːlʲi. akʷ luːptanl sornʲiŋ luːptaɣ naːnki; akʷ-mus larɣi, samnə at taxnawə. tari-peːsʲnʲi-maːlə-sow nomsi: “kataɣəm a-man xuripaɣ, woss lisʲsʲentənuwm!” juːntəp-sam-nʲaːletəl liste, anʲ luːpte kʷotʲlenəl taːra minwəs. nʲaːle lime jui paːlt uːlmən joxtuwəs. jol ojilmatwəs, uːlmeji, xot eːkʷa lʲawtnet sujti: “nʲawramət toxa ti osʲmarleɣət; maː jaleɣət, wit jaleɣət, eːləm-xoləs xujnə towlʲe taːra-paːxtawə.” luwe sis-tarməl noːŋx sajkələmet kʷol-aːwi-suːnttə xuji. jola ti waːɣli, anʲ kʷolən juː ti sʲalti. anʲ-manʲ eːkʷa laːwi: “eːjja! tari-peːsʲ-nʲimaːlʲe-saw usʲ ta joxtasən?! uːlmən xosaɣ ta xujaslən, toːrəmnə neːl taːratawesən, parapaːrsəxnə anʲ neːn tuːlmentewəs.” tari-peːsʲ-nʲimaːlʲe-sow laːwi: “taw kaːse, woss tuːlmentite! neːɣiŋ mat-xotpa xuːnʲ oːli? neːtal oːluŋkʷə oːs joməs.” aːkʷa eːkʷan tiːttuwəs, ajtuwəs; eːlalʲ oːs tiː minuŋkʷə pats. aːkʷa eːkʷan kit eːlmip kasajil majwəs, keːr-xortxən-sowəl majwəs, keːr-sowr-sowəl majwəs, keːr nʲoliŋ maː-taprisʲ-sowəl majwəs, maːnʲ keːr-sort-sowəl majwəs. ”apiɣkʷə!” -laːwi - ”ta mineɣən, juːlʲə joxtnən porat to pormasanəm taːra ul toteln! aːnəm eːreɣət. mat jaːrəmnə, monʲsʲəmnə pateɣən: aːnəm saka ul kaːsteln, laːsʲəlakʷ, laːsʲəlakʷ noməlmatən! ti mineɣən, jolalʲ sunsən, saːt nuj-kʷol lʲuːlʲi; akʷaɣ oːs, porəsʲ wojkən-uj xurip. anʲ nuj-kʷolət paːlt jol taːrateɣən, nuj-kʷolətnəl sam-paːl maːxum kʷona neːɣleɣət, akʷ paːl sam-paːlanl paliɣ pokatimət, akʷ sam-paːlanl pusət. naŋ tot kitapan: «xoːŋxa oːsət, porsʲət uːreɣən?» - tan laːweɣət: «paːraparsəx oːsət, porsʲət uːrew». -naŋ tox laːweln: «tox ul laːwen! tox laːwen: tari-peːsʲ-nʲimaːlʲe-sow oːsət, porsʲət uːrew! juil naːjiŋ xoːn jiw, anʲ-manʲ paːraparsəx oːsət, porsʲət uːrew ke laːweɣən: joməsnə pateɣən». - tuːl samanan xot-pusməlten, lili-eːpəntəl puːlasen, kit samiŋiɣ woss jeːmteɣət. tuːl oːs ta mineɣən eːlalʲ. saːt nujiŋ kʷolən oːs joxteɣən: akʷaɣ mis woikən uj xurip. oːs jol taːrateɣən, tuː pateɣən, kaːt-paːl mir kʷon neːɣleɣət. kitəpijan: «xoː mist uːreɣən? tan laːweɣət: «man paːraparsəx-mist uːrew». -naŋ tox laweln; «nan tox ul laːwen! tox laːwen: tori-peːsʲ-nʲimaːlʲe-sow misət uːrew! tox at ke laːweɣən: juil naːjiŋ xoːn jiw, peːləmlawen». - tuːl kaːtanl lili-eːpəl puːlasen, xot woss pusmeɣət. tuːl oːs ta mineɣən, akʷ maːt oːs saːt nuj-kʷol lʲuːlʲi. akʷ-muːs teːltal luːt. tuːl jol ti taːrateɣən, jola pateɣən, laɣl-paːl mir nuj-kʷolnəl kʷona waːŋkeɣət. naŋ kitapan: xoː luːt uːreɣən?» - tan tax laːweɣət: «man paːraparsəx luːt uːrew» - naŋ tax laːweln: «tox ul laːwen! lawen: tari-peːsʲ-nʲimaːlʲe-sow luwət uːrew; atʲiŋ ke - juil naːj-xoːn jiw - peːləmlawen; nan aːtʲim, luːt aːtʲim, pusən teːwen». naŋ nuːpələn joməs ke oːleɣət, laɣlanl lili-eːpəl puːlasen, pusməlten! anʲ ti minən!”

9.

anʲ tari-peːsʲ-nʲimaːlʲe-sow luwe sisən ti taːləs. saːt urpa xoːmsʲit ti wiste; minnə tul, xajtnə tul xalən oːs ti teːliɣtawəs. akʷ-maːt jolalʲ kʷoss sunsi: saːt nuj-kʷol lʲulʲi, akʷaɣ oːs, porəs, woikən-uj xurip. anʲ luwe jola to taːats. mir kʷona neːɣləs, akʷ-mus sam paːlət. kitəpijane: “xoː oːsət, porsʲət ureɣən?” - ”paːraparsəx oːsət, porsʲət uːrew.” - ”aːtʲim, tox ul laːwen! laːwen: tori-peːsʲ-nʲimaːlʲe-sow oːsət, porsʲət, uːrew; anʲ-manʲ tox laːweɣən: paːraparsəx oːsət, porsʲət uːrew, naːj-xoːn juil joxti, pusən teːwen!” puŋk pineɣət, laɣlen xujeɣət. – ”xotəm ul laːwew: tari-peːsʲ-nʲimaːlʲe-sow oːsət, porsʲət uːrew?!” taw lili-eːpatəl puːlasəsane, pusən samiŋiɣ jeːmtsət. - luwe nʲowmat minnə tul, xajtnə tul xalən oːs ti teːliɣtawəs. tox minimet akʷ maːt jolalʲ sunsi: saːt nuj-kʷol lʲuːlʲi, jaːtəl misət akʷaɣ woikən-uj xuripət. luwe jol ti taːrats, jol ti pats. anʲ kʷol-mir kʷona kʷaːleɣət, akʷ-muːs kaːt-paːlət. kitəpijane: “xoː misət ureɣən?” - ”paːraparsəx misət uːrew.” - ”tox ul laːwen! laːwen: tari-peːsʲ-nʲimaːlʲe-sow misət uːrew; juil naːj-xoːn jiw, naːjin peːləmlawen.” lili-eːpəl puːlasəsane, kaːtanl pusiɣ jeːmtsət. taw laɣlen ti xujeɣət: “kaːtiŋiɣ jeːmtsuw, xotəm ul laːwew: tari-peːsʲ-nʲimaːlʲe-sow misət uːrew?!” tuːl-uːlt luwe sisən taːləs, oːs ta lapejəptuwəs. akʷ maːt jolalʲ sunsi: luː akʷaɣ woikən-uj xurip, saːt nuj-kʷol lʲuːlʲeɣət. luwe oːs jola taːrats, kʷolətnəl laɣl-paːl mir kʷona waːŋkeɣət. kiteːpijane: “xoː luwət uːrəɣən?” - ”paːraparsəx luwət uːrew.” - ”tox ul laːwen! laːwen tori-pəsʲ-nʲimaːlʲe-sow luwət uːrew; tox ke laːweɣən joməs naknə pattawen!” - ”xotəm ul laːwew!” laːweɣət. tori-peːsʲ-nʲimaːlʲe-sow laɣlanl lili-eːpəl puːlasəsane, pusən laɣliŋiɣ jeːmtsət. anʲ luwe oːs eːlalʲ nʲowmats; minnə tul, xajtnə tul xalən oːs ta teːliɣləs.

10.

tox minimate akʷ-mat-eːrt eːlalʲ sunsi: saːt towləp keːr-luː tarməl uːs uːnli. anʲ luwe ta uːs-aːwi-suːntən, tuː ti taːrats. jola poriməs; luwe tuː neːɣmats, juː ti sʲaltəs. anʲ toːrəm tawen taːrataːlim man teːləm naːj-aːɣi, man teːləm oːtər-aːɣi oːli kʷol-kiwərt. anʲ aːɣi laːwi: “ejja tari-peːsʲ-nʲimaːlʲe-sow! anʲ uːlmən xosaɣ ta xujamən, naŋ neːn am xuːnʲ oːsəm? anʲ paːraparsəx, taw neːte oːsəm.” tari-peːsʲ-nʲimaːlʲe-sow laːwi: “am naŋəntəl manər waːreɣəm; naŋ kʷoni-paːlən joːməs neː oːs oːli.” anʲ neː xot eːssəmawəs. tori-peːsʲ-nʲimaːlʲe-sow laːwi: “ti-neː! aːnəm teːnə matər totən, siməm eːtxəlawə!” - ”am kʷoni-paːləm joməs neːn, am kʷoni-paːləm xaramiŋ neːn teːn-utəl woss totawən!” - ”ja-ja! aːnəm teːn-utəl toteln, siməm eːtxəlawə!” – ”am man teːn-ut oːnʲsʲeɣəm, am kʷoni-paːləm joməs neːn woss totawən!” – ”ja! paːraparsəx manər mutra oːnʲsʲi?” - neːte laːwi: “am kʷoni-paːləm mutraŋ neːn woss laːwi; am mutra at oːnʲsʲeɣəm.” - ” ja laːwən, molʲəx laːwən!” tuːl neːten teːn-utəl tit totwəs. ”ja!” - laːwi - ”laːweln, manər mutra oːnʲsʲi?” - ja! manər mutra oːnʲsʲi? neː-matər mutra at oːnʲsʲi; tajəx” - laːwi - ”saːt talʲxəp naːŋk tarməl xulax xuril ta isi, xotalʲ oːlne uːs xotalʲ oːlnə jere akʷ-muːs sunsiɣlite; an-manʲ naŋ xoːntawən ke, roːŋximə woːrnə ta tiːɣləmli”. teːs, aːstəs, kʷona kʷaːləs, luwe neːten xot tuːjtwəs; taw anʲ naːŋk-titən minəs, jola ramxats, akʷ same tuːp noːŋxalʲ sunsuŋkʷe neːltəs.

11.

tox xujimate ali nʲoːr-awlnəl xulax ta roːnɣiləme sujti. sunsite: anʲ-manʲ xulax-oːjka ta jiw; nʲaːrəm-xale toːrəmnə sartite, taː kem lʲuːlʲit ta jiw. jis, jis, anʲ saːt talʲxəp naːŋk-jiw talʲxən tuː ta isəs. xotalʲ oːlnə uːs-jer akʷaɣ sunsiɣlite, tiːɣl roːŋximə eːlal ta tiːɣlamləs. tari-peːsʲ-nʲimaːlʲe-sow ti xoːntwəs. taw anʲ kʷaːlaps, keːr-xortxən-sowən sʲaltapəs, anʲ xulax juil ta nʲussəltawəs. ta nʲawluwəs, nʲawluwəs: ti waːtʲimtəste, tuːl xotalʲ uːstiɣpəste. jolalʲ sunsi: sowr-xuril tot suːlinti. taw keːr-sowr-sowen sʲaltapəs, oːs ta nʲawlite. waːtʲimtəste, joxtuŋkʷə patəste, oːs xot uːstiɣpəste. jolalʲ aːŋkʷati: nʲoliŋ maː-taprisʲ ase lʲuːlʲi. taw oːs anʲ keːr-nʲoliŋ-maː-taprisʲ-sowen sʲaltaps, anʲ oːs akʷ ta lʲoːŋx xosit juil nʲawlite. oːs ti joxtuŋkʷə jeːmtəste, maːnʲ sort xuril sʲaːrisʲnə ta sʲaltəs. taw oːs keːr-sort-sowen sʲaltapəs, sʲaːrisʲ witən ta xumit lʲoːŋx xosit ness wosʲxəsax-tiɣləs. joxtuŋkʷə ti jeːmtəste, anʲ sort xurip xumit sʲaːrisʲ-jaːŋk-taːra noːŋx lakʷalts, taw toːsəm maː-tarməl tot ti puːɣəste; sej-sam xis-sam saɣrəste, naːjin paltəste; noŋxalʲ minəm lotxe jola raːtite, jolalʲ minnə lotxe noːŋxalʲ raːtite. tox raːtimate jui paːlt anʲ paːraparsəx sownʲax-neː xuril eːla tiːɣlamləs. juːntəp-sam-nʲaːle liste, anʲ sownʲax-neː kit paːle tuːp xuji. oːs nalw paltəste, naːj-xalnəl keːr-sowr xuril eːlalʲ suːlinti. juːntəp-sam-nʲaːləl liste, kit oxsaɣ xujeɣ. oːs najnə paːltəste, naːj lotxe xariɣlənə-mos ta-kʷoss sunsi, minəm aːtʲim. neːte tuːlmentəm xumit tot ti alwəs.

12.

anʲ nʲawəlmat akʷ nakət towləl minəs: matər saːmnə joxts, at waɣte. akʷ nakət sowr-xuril, akʷ nakət maː-taprisʲ xuril, akʷ nakət maːnʲ sort xuril minəs: xoti saːmnə joxts, akʷ muːs at waɣte. soma xoːluŋkʷe ti noməsi, luːnʲsʲim tot ti joːmiɣti. akʷ-mat-eːrt siset xoːtpa lʲaːɣi: “texam! naŋ manər waːreɣən? aːstən, am ti marsʲəmawesəm!” tuːlʲə aːŋkʷati, luwe tit lʲuːlʲi. ”taːlən” - laːwi - ”am sisəmnə!” luwe sisnə ta taːləs. eːlalʲ ti nʲowmats; minnə tul, xajtnə tul xalən teːliɣtawəs.

13.

tox minəmate akʷ-mat-eːrt matər eːlən ti kuritənə sujti. luwe jol ti lʲuːlʲəs. tari-peːsʲ-nʲimaːlʲe-sow nuːpəl lʲaːɣi: “waɣlən eːlən manər kuritawə?” - ”am xotəl waɣləm?! matər kuritawə!” - ”anʲ jelpiŋ sʲakʷ ti; toːrəm-naːj akʷ paːle toːrəmt numən teːɣ, akʷ paːle toːrəm kit saːmt teːɣ, maːɣi-toːrmiɣ lap to teːweɣ; man uːrəl minimeːn ti naːj-taːre?!” - tari-peːsʲ-nʲimaːlʲe-sow laːwi: “am os xotəl waɣləm?!” - luː laːwi : “am nʲol-sam-asəmnə sʲaltən, waːt arsin woikən toːr wojən, waːt arsin sʲaskən toːr wojən!” luː-nʲol-sam-asnə sʲaltəs, anʲ-manʲ nʲol-sam-as kiwərt lapka oːli. waːt arsin woikən toːr wis, waːt assin sʲaskən wis, lapkanəl kʷona kʷaːləs, luwe laɣile kaːte lap peːriɣtaxts, takʷi oːs tuː peːriɣtaxts. anʲ luː ta nʲowmate sujti. xosa minəs, man waːtʲi minəs; akʷ-eːrt luː jol ti lʲuːlʲəs. ”kʷaːlən!” = laːwi. peːriɣtaləm toːraneːn sʲaranl tuːp jol raɣatast, anʲ naːj-taːre minəmeːn-sis ti tajwest.

14.

luwe-tarməl eːlalʲ oːs mini. eːlən oːs ti matər kuritənə sujti. luwe laːwi: “manər kuritawə, waɣlən?” - ”am xotəl waɣləm?!” - ”eːlalʲ sunsən sar, taw manər waːrawə!” eːlalʲ sunsi: waːt xaːpɣa akʷan saɣxatiɣleɣt, tuːl lakʷa mineɣət; toːrəm-saːm akʷ-muːs lapejaːlawə, neː-matər minuŋkʷə at pasapawə. luwe laːwi: “tiːɣ ul noməlmatən, tuː ul noməlmatən!” eːlalʲ ta nʲowmats. tari-peːsʲ-nʲimaːlʲe-sow noməlmati: ti xaːpɣat man pilisʲme oːnʲsʲeɣət. xaːpɣat-toriɣ minəs, xaːpɣat lakʷa xossulaxtast, tari-peːsʲ-nʲimaːlʲe-sow xoːjwəs, luwe sisnəl jola raɣats, luwe xotalʲ minəs, at waɣte, takʷi xotalʲ minəs, at waɣte. noːŋx sajkələmat xaːpɣa-townə eɣin-aspinəl taɣmatəm, tiːɣlʲə-tuːlʲə tot ti xosɣawə, jol at joxti, noːŋx at joxti. ”ejja!” - laːwi - ”sʲanʲəm moːlal toːna ta laːwəs: xuːnʲtə matər naknə pateɣən, jol ul joxtən, noːŋx ul joxtən; anʲ sussən: jolalʲ at joxteɣəm, noːŋx at joxteɣəm. akum-eːkʷa molal ti laːwi: mat jaːrəmnə, monʲsʲəmnə pateɣən, aːnəm kaːstən; taw tit xot lʲuːlʲi, am tit ti xoːleɣəm?!” ton oːrəmt matər ti mirritawə. tuː aːŋkwati: xuːrəm towliŋ luː sis-tarməl anʲ aːkʷa-eːkʷa ti jiw. “xumlʲə jeːmtsən, apiɣkʷə?! aːnəm manəriɣ rottiɣ kaːstaslən; sʲaj ajimə uːnlasəm, sʲaj-aːnit akʷ towrit sakʷalast; manər jaːrəmnə, monʲsʲəmnə patsən?” - ”akum-eːkʷa! usnə maːm ti, jola at joxteɣəm, noːŋxa at joxteɣəm; matər saːmnə luwəm totwəs.” aːkʷa-eːkʷan waːt xaːpɣa kʷonsiɣtawest, supiɣ sawmtawest; laːwi: “eːləm-xoləs jisiŋ torəm, eːləm-xoləs notiŋ toːrəm uːntxati; mana eːləm-xoləs naŋ taːran pasapi?!” tari-peːsʲ-nʲimaːlʲe-sow kʷoss aːŋkʷati: aːkʷa-eːkʷa akʷ-muːs aːtʲim, takʷi maːn pats, tot ta lʲuːlʲi. luː aːtʲim, matər aːtʲim.” sornikʷe! - laːwi - luwəm xotalʲ totwəs, tit ti xoːleɣəm.” ton oːrəmt luwe taw siset lʲaːɣi: “aːstən! am ti marsʲəmawesəm, taːlən sisəmnə!” sʲaɣtim luwe sisən ta taːləs. “saːt urəp xoːmsʲin wojeln” - laːwi luwe - ”juniteln aːnəm!” saːt urəp xoːmsʲite wiste, luwe akʷ sʲos juniɣtəste, noːŋxa ta lapejaptuwəs. minnə tul, xajtnə tul xalən os ta teːliɣtawəs.

15.

tox minimatet eːlən matər oːs ti kuritənə sujti. luwe jol ti lʲuːlʲəs, laːwi: “manər kuritawə eːlən, waːɣlən?” tari-peːsʲ-nʲimaːlʲe-sow laːwi: “am xotəl waːɣləm?” - ”at ke waːɣlən, saːt-suːja-nʲaːra-uːlttə-xujnə oːjka torwinti; oːləm pasmeːn ti, waːssiɣ minuŋkʷə at pasapimeːn, ti alawəmeːn; - moːlal aːkʷən-eːkʷən matarəl at majwesən?” - tari-peːsʲ-nʲimaːlʲe-sow laːwi: “am manarəl majwesəm?” - luwe laːwi: kit eːlmip kasajil at majwasən?” - ”soːlʲ!” noməsi ”kit eːlmip kasajil majwesəm.” - luwe laːwi: “minən, nʲoliŋ maː-taprisʲ-sownə sʲaltən, nʲol-nʲaːrɣe, palʲ-nʲaːrɣe jakteln; naŋ eːriɣ ke totuŋkʷə laːwwesən, moːjt ke totuŋkʷə laːwwesən: ta weːriɣteɣən; at ke laːwwesən: ti alawən.” tari-peːsʲ-nʲimaːlʲe-sow nʲoliŋ maː-taprisʲ-sowen sʲaltəs, saːt-suːja-nʲaːra-uːlttə-xujnə oːjka paːlt nʲoliŋ maː-taprisʲ-xuril minəs. luwe tot ta xulʲtəs. anʲ oːjka lili kʷonalʲ taːrati: taw sisiɣ xotalʲ ta aːlmawə; lili juːlʲə xarti: nʲol-sam-as kiwərnə aːla ti tuːlawə; lʲalʲt wortxati, woril weːriɣti. kit eːlmip kasaje leɣmats, anʲ oːjka nʲol-nʲaːrɣe, palʲ-nʲaːrɣe xot-jaktəsaɣe, sʲeːpən pinsaɣe. luwe laːwi: “molʲəx jajən, taːlən!” luwe nuːpəl xajts, sisen ta taːlmats. luː noːŋxal nʲowmats. saːt-suːja-nʲaːra-uːlttə-xujnə oːjkan kʷoss nʲawliɣtawəs, luwe noːŋx talapejəs, at ti joxtuwəs. saːt-suːje-nʲaːra-uːlttə-xujnə oːjka laːwi: “ejja tari-peːsʲ-nʲimaːlʲe-sow! toːrəm xonal, akʷ xumiteːn patneɣ, akʷ neːteːn patneɣ naŋ ta oːleɣən; am ta xoːlasəm.” tari-peːsʲ-nʲimaːlʲe-sow tuːlʲə lʲalʲt laːwi: “xonal eːləm-xoləs jisiŋ toːrəm, notiŋ-toːrəm uːntxati, naŋ jotən mana eːləm-xoləs weːriɣti; toːna ti alasləm.” luwe eːlalʲ ta nʲowmats; minnə tul, xajtnə tul xalnə teːliɣtaːlwəs.

[moːjt mak jelpiŋ maːte tit ti oːli; eːkʷat kʷona kʷaːleɣət, pasən tarməl sʲaːli oːln pinawə.]

16.

Tari-peːsʲ-nʲimaːlʲe-sow luwe tox minimet akʷ-eːrt jola ti lʲuːlʲi, laːwi: “nʲoləm saːs-kursʲipəl maːɣeɣən, kaːtaɣəm, laɣlaɣəm saːs-kursʲipəl maːɣeɣən, leːɣəm sirejin tuː peːreln!” nʲole, kaːtaɣe, laɣlaɣe saːs-kursʲipəl maːɣsane, leːɣe sirejil peːrəste. luwe laːwi: “anʲ taːlən am sisəmnə!” luwe sisən taːləs, luwe noːŋxa lapejəs; minnə tul, xajtnə tul xalən teːliɣləsiɣ. tox minimateːn akʷ eːrt jola ti taːrats, jola ti pats. jol patəm maːtet kʷoliɣ-suːmjəxiɣ uːnleɣ. luwe laːwi: “waɣlən jola; minən, kirt-nʲolp-eːkʷ-aːɣi nʲirəmteln, sʲaːnʲe jol-ojilmatwəs! juwlʲə kʷoss joːmentaːls, luwe laːwi: “ul minən, tiːɣ jajən! naŋ tax xotəm mori ti noməlmatəɣən, eːkʷa ti sajkəli, oːləm pasəmeːn ti; am nʲol-sam-asəmnə sʲaltən, tot kaːpak oːli; ta kaːpaktə xuːrəm sʲarka ajən!” Tari-peːsʲ-nʲimaːlʲe-sow luː nʲol-sam-asen ju-sʲalti, nʲol-sam-ast anʲ-manʲ kaːpak; xuːrəm sʲarka ajəs, kʷona kʷaːls. luwe laːwi: “anʲ minən kirt-nʲolp-eːkʷ-aːɣi nʲirəmteln!” kʷolnə juː sʲalts, anʲ aːɣi kʷona nʲirəmtəste. luwe laːwi: “taːlən molʲəx, ti jiwwəmeːn!” luwe paːlt tuːp joxts, anʲ kirt-nʲolp-eːkʷa kʷona neːɣləs. luwe laːwi: “neːn xot-sʲaltəmteln, ti jiwwəmən!” aːɣi xot-sʲaltəmtəste, molʲəx luwe sisən taːləs, eːlalʲ nʲowmats. kirt-nʲolp-eːkʷan luː nʲole puːwwəs. luː puŋke nʲowmats, anʲ saːs-kursʲip xot-leɣmats. luː kaːtən tuː lakwəs: luː kaːte nʲirəmtawəs, anʲ saːs-kursʲipiɣ xot-leɣmatsiɣ. tuːl luː-laɣlən lakʷəs: luː noːŋxalʲ porimame muːs anʲ saːs-kursʲipiɣ oːs ta leɣmatsiɣ. tuːl luː leːɣən lakʷəs: kit kaːt taɣəl tulʲane anʲ sirejil pusən supiɣ jaxtuwest. juil ti nʲawluŋkʷə patwesiɣ. ti puːwaweɣ, ta puːwaweɣ. luwe laːwi: “kaːtət naŋ manər oːnʲsʲeɣən, meːn ti puːwawəmeːn?!” tari-peːsʲ-nʲimaːlʲe-sow laːwi: “am kaːtət neː-matər at oːnʲsʲeɣəm.” anʲ kirt-nʲolp-eːkʷan ti puːwaweɣ, ta puːwaweɣ. luwe laːwi: “naŋ manərəɣ uːreɣən; kaːtənt manər oːnʲsʲeɣən, at waɣlən? kaːten aːŋkʷati: saːt urəp xoːmsʲite kaːtət lʲuːlʲi. anʲ luwe ta juːniɣtəste; minnə tul, xajtnə tul xalən ta teːləmtawəs. anʲ kirt-nʲolp-eːkʷa laːwi: “ejja tari-peːsʲ-nʲimaːlʲe-sow! aːɣi ta tuːlmentaslən; anʲ toːrəmnə ta wojwesən, lilin ta neːɣləs.

17.

eːlalʲ ta minəsiɣ. akʷ-mat-eːrt paːraparsəx-uːsən ta neːɣləsiɣ. luwe anʲ uːs-aːwin tuː ti jola taːrats, jola ti pats. neːte iŋ kʷon neːɣləs, iŋ kaːtanen akʷan puːwsiɣ. neːten juː ta tuːlwəs. jun neːte laːwi: “ejja eːriɣ-xum, moːjt-xum! saka saw saw totsən!” soriŋ teːp, maːɣiŋ teːp pasan waːrwəs, teːŋkʷə patsiɣ. akʷ-mat-eːrt neːte laːwi: “kʷon kʷaːlən sar, luwənnə kʷon woːwesən!” kʷona kʷaːls, luwe laɣle noːŋx-aːlmamə. “jajən!” - laːwi - ”am laɣləm towən peːlwəs.” tuː mini: anʲ-manʲ kirt-nʲolp-eːkʷ-aːɣi tuː xanujəm. anʲ kirt-nʲolp-eːkʷ-aːɣi jot oːs juː sʲaltsiɣ; kit neː xalnə uːnttəs, anʲilaxtast, sipiɣxatsət. teːst, aːstast; neːɣaɣe nupəl laːwi: “am ti xujeɣəm; am noːŋx-kʷaːlnəm mos tunra-sʲaxl eːkʷaɣ-oːjkaɣ aːsʲaɣəm-sʲaːnʲaɣəm paːlt at ke toteɣən: oːləm paseːn ti, sip-luweːn aːt osiŋaɣ saɣrəpijaɣəm. ti uːs mire-lutetəl, oːsetəl, misetəl, luwetəl akʷ-muːs amki maːmnə toten!” puŋke , same manʲiɣts; jol ta xujəs. akʷ-eːrt xujimate xoːntəli, eːkʷa lʲawtnet sujti: “anʲ maːnʲ maːxəm oːlnə sʲiranl ti?! tiːɣl eːlalʲ oːlnə xotpa eːkʷate woss mini, oːjkate woss xuji; mana nʲawrəmakaɣəm sawataweɣ! - anʲ moːlal kit eːlmip kasajil majlasləm, keːr-xortxən-sowəl majlasləm, keːr-sowr-sowəl maːjlasləm, keːr nʲoliŋ-maːtaprisʲ-sowəl majlasləm, maːnʲ sort-sowəl majlasləm; tajanəm tox ti taːra totiane!” taw eːla ta xuji, noːŋx at kʷaːli. akʷ-eːrt xujimate eːkʷaten sʲopsʲəltawə: “kʷaːlən noːŋx, juː ti joxtsuw!” noːŋx-kʷaːli, sʲaːnʲaɣe-aːsʲaɣe paːlt joxtəm. sʲaːnʲaɣe-aːsʲaɣe taw paːlt lakʷme at waːs, taw oːs sʲaːnʲaɣe-aːsʲaɣe paːlt lakʷme at waːs. anʲilaxtsət , sipiɣxatsət. ta xurip uːs ta teːləs: xajtnə tul silimə uːnli, minnə tul silimə uːnli. oːln-kʷol uːntxats, sorni-kʷol uːntxats. eːla oːleɣət, eːla sʲunʲeɣət.

18.

tunra-sʲaxl uːset xosa oːləs, man waːtʲi oːləs, akʷ-mat-eːrt tari-peːsʲ-nʲimaːlʲe-sow neːɣaɣe nuːpəl laːwi: “am neː minnə neːɣiŋ saːm oːs kinseɣəm, xum minnə xumiŋ saːm oːs kinseɣəm.” sʲaːnʲe laːwi: “ejja! xonal eːləm-xoləs jisiŋ toːrəm, notiŋ torəm uːntxati: takʷsi-leːɣn, toːja-leːɣn akʷ tox tortal ta kinsilən!” anʲilaxtast, sipiɣxatsət; kʷona kʷaːləs, luwe sisən taːləs, minəs. - xosa minəs, waːtʲi minəs, akʷ-eːrt luwe sʲaːrisʲ-kʷotʲəlnə jol ti taːrats. anʲ-manʲ sʲaːrisʲ-wit taːra jolalʲ oːln-aːwi, sorni-awi. luwe tuː ta xulʲəste, takʷi jola ta sʲaltəs. jola joxti, tot wit-xoːn uːse: oːln-uːs, sorni-uːs. kʷol poːxet maːnʲ kʷol uːnli; tuː ta sʲalts. maːnʲ kʷoltə wit-saɣip saɣiŋ neː, wit-weːsʲp weːsiŋ neː uːnli. anʲ-manʲ wit-xoːn-aːɣi laːwi: “ejja tari-peːsʲ-nʲimaːlʲe-sow toːrəmnə teːl aːnəm ta laːwwesən!” anʲilawəs, sipxuwəs. soriŋ teːpəl, maːɣiŋ teːpəl tittuwəs. neːte laːwi: “minən jaɣ-piɣanəm palt, janiɣ kʷolnə sʲaltən; weriɣteɣən ke: ta weːriɣteɣən; at ke weːriɣteɣən: at ta weːriɣteɣən.” kʷaːləs, ta minəs. juː sʲaltəs: saːt xum kasərleɣət. taw nupəl aːŋkʷatast, jol aːla ti pats, woril ti weːriɣts. “ejja tari-peːsʲ-nʲimaːlʲe-sow!” - laːweɣət - ”mana totn-utnə totwesən, mana aːlentən-utnə aːlentawesən?” - ”oːlnə eːləm-xoləs akʷ-mat maːn xuːnʲ joxti?!” - ”naːj-waːpsiɣ, oːtər-waːpsiɣ oːluŋkʷə ke taːnɣeɣən pasannə tiɣ uːnttən!” pasannə uːnttəs; kasərlaŋkʷə, saːkmətlaŋkʷə eːlalʲ ta patsət. akʷ-muːs taw maːsʲtər, saːt xum kʷoni paːlt taw xaːsi; taw maːsʲter. akʷ-eːrt saːt xumit nuːpəl laːwi: “amki maːɣiŋ xum, amki witiŋ xum; maːm-witəm nomtnə ti patwesəm, ti mineɣəm.” minuŋkʷə ti pats, anʲ neːte sʲoːpitawəs. wit-xoːn-aːɣi laːwi: “manər suːsas eːri, a-man mis-luː-suːsas eːri, man-os wit-xul-suːsas eːri?” tari-peːsʲ-nʲimaːlʲe-sow laːwi: ”ul wit-xul-susas eːri; xonal eːləm-xoləs jisiŋ toːrəm, eːləm-xoləs notiŋ toːrəm uːntxati, eːləm-xoləs manər teɣ waːssiɣ?!” neːte laːwi: “minən eːlalʲ, juːlʲə joxtnən porat amki joxteɣəm.” anʲ tari-peːsʲ-nʲimaːlʲe-sow luwe paːlt anʲ wit-aːwinəl noŋx ta kʷaːləs. luwe anʲ-manʲ akʷaɣ ta kanʲsʲəm; nʲowlʲe xoːləm, luwe xoːləm. tari-peːsʲ-nʲimaːlʲe-sow lili-eːpəl puːlasəste: moːlal manər luː oːləs, moːlal manər uj oːləs, joməs luwiɣ usʲ ta jeːmts; akʷ nʲol-sam-asenəl suːltməl neːɣli, akʷ nʲoːl-sam-asenəl posiməl neːɣli. ”taːlən” - laːwi - ”am sisəmnə!” luː-sisən taːləs, eːlalʲ nʲowmats; minnə tul, xajtnə tul xalən teːliɣtawəs.

19.

tox minimatet akʷ maːt jola ti pats. anʲ patəm maːtet xaːŋxəltəp, numi owle toːrəm nuːpəl noːŋxalʲ ta mini. luwe ti tuː teːləm nʲirən neːɣəste, ti tuː teːləm pumən neːɣəste. takʷi anʲ xaːŋxəltəp xosit noːŋx ta xoːŋxəs. toːrəmnə noːŋxa ta joxts. eːt-pos-oːjka aːmpeːntəl xartxateɣ. tari-peːsʲ-nʲimaːlʲe-sow ta-kʷoss nʲawli: at joxtijaɣe. joːŋxeɣ, joːŋxeɣ, moːnt minəm maːteːnnəl oːs ti mineɣ. tari-peːsʲ-nʲimaːlʲe-sow akʷ maːn ti uːrmiɣtaxts. anʲ eːt-pos-oːjka joxtəs. “ejja tari-peːsʲ-nʲimaːlʲe-sow!” - laːwi - ”naŋ os tit?! man uːrəl tiːɣ joxtasən?” - ”oːlnə eːləm-xoːləs akʷ-mat maːn xuːnʲ joxti?” anʲ xoːntxatəm maːteːnt kʷol uːnli. eːt-pos-oːjka laːwi: “tari-peːsʲ-nʲimaːlʲe-sow sʲaltən tiːɣ, am tajəx joxteɣəm!” kʷol kiwərt uːnlənə aːɣit nuːpəl laːwi: “maː-xum mat xum ul sawatən!” anʲ eːt-pos-oːjka ta minəs, taw juː ta sʲaltəs. neː xasap sajiŋ paːlt uːnli. taw jol uːnttəs. xosa, man waːtʲi uːnləmate xasap sajiŋ-paːl nʲowəsaŋkʷə pats, taw poːlʲuŋkʷə ta pats. asʲərman ti teːwə, ta teːwə; eːt-pos-oːjka ti sʲalti, aːɣit nuːpəl lʲawti: “maːnʲ maː-xum oːlnə sʲire ti?!” waːssiɣ neː-mat asʲərəm aːtʲim. anʲ eːt-pos-oːjkan naːj-waːpsiɣ sʲoːpitawəs, oːtər-waːpsiɣ sʲoːpitawəs, xasap sajiŋ paːlnə tuːlwəs. eːt xujəs, xolit kʷaːləs, takket minəs.

20.

xosa minəs, man waːtʲi minəs, akʷ-mat-eːrt xoːtəl-eːkʷa paːlt joxtəs. ta-kʷoss nʲawli, nʲawli: at joxtite; xoːtəl-eːkʷa xuːrəm luwəl tox ti mini. tuːl akʷ maːt uːrxats, anʲ xoːtəl-eːkʷa tot ti joxtəs. anʲ-manʲ tot kʷol uːnli. xoːtəl-eːkʷa laːwi: “ejja tari-peːsʲ-nʲimaːlʲe-sow naŋ os man totn-utnə totwesən, man alentən utnə aːlentawesən?!” - ”oːlnə eːləm-xoləs akʷ mat maːn xuːnʲ joxti?” - ”sʲaltən ju, am tajəx joxteɣəm!” aːɣit nuːpəl laːwi: “maː-xum mat xum ul sawatən!” taw juː sʲaltəs, xasap sajiŋ paːl xani. xosa, man waːtʲi uːnlimate anʲ xasap nʲowəsaːluŋkʷə pats. reːɣn ti teːwə, ta teːwə; witiɣ ti peːriɣləs. xoːtəl-eːkʷa juː joxti, aːɣit nuːpəl lʲawti: “maːnʲ maː-xum oːlnə sʲire ti?!” neː-matər reːɣ aːtʲim waːssiɣ. soriŋ teːpnə, maːɣiŋ teːpnə tittuwəs. teːs, aːstəs; xoːtəl-eːkʷa nuːpəl laːwi: “xoːtəl am totiɣliləm sar!” xoːtəl-eːkʷa laːwi: “naŋ mat-namiŋ joməsʲakʷ totiɣleɣən?” - am man lʲuːlʲsiŋ totiɣliləm?! akʷ tox joməsʲakʷ totiɣliləm.” xoːtəl-eːkʷa laːwi: “naŋ kaːsən; joməsʲakʷ ke totiɣlilən, totiɣlelnǃ” tari-peːsʲ-nʲimaːlʲe-sow xoːtəl wiste, ta totuŋkʷə patəste. jolalʲ sunsi: joli toːrəmt jaːtəl mir akʷaɣ sam-paːlət, suːp paːlət. akʷ maːt kit xum alxateɣ, keːlpiɣ-sajiɣ alxateɣ. tari-peːsʲ-nʲimaːlʲe-sow nomsi: am tot ke oːlnuwəm, ta as-piːɣət, teːnteːn alxatneteːn sʲoːpitənuwaɣəm. tox noməlmatiɣls, anʲ utiɣ jol-raɣatəsiɣ, xoːləsiɣ. tuːl oːs ta mini. akʷ-mat-eːrt oːs jolalʲ sunsi: kit eːkʷa loːŋɣitaxteɣ, jeːrxateɣ, taw nomsi: am tot ke oːlnuwəm, ta aːŋkʷa noːniɣ, teːnteːn sʲoːpitənuwaɣəm. anʲ kulʲiɣ raɣatəsiɣ, xoːləsiɣ. eːlalʲ ta minəs. xosa, man waːtʲi minəs, akʷ-eːrt xoːtəl-eːkʷa paːlt ta joxtəs. xoːtəl-eːkʷa kitapəs: “joməsʲakʷ jalsən?” – ”jalsəm.” – ”neː matər lʲuːlʲ at waːrsən?” – “at waːrsəm.” xoːtəl-eːkʷa laːwi: “tari-peːsʲ-nʲimaːlʲe-sow naŋ xoːtəl ke oːsʲnuwlən, soma lʲuːlʲnə eːləm-xoləs aːtʲim oːlnuw, pusən alnuwen; – manəriɣ aləm eːləm-xoləsan ti nʲila eːləm-xoləs?” tari-peːsʲ-nʲimaːlʲe-sow laːwi: “alxateɣət, lʲawteɣət; am ness noːməlmatsəm, tan raɣatst.” xoːtəl-eːkʷa laːwi: “xonal eːləm-xoləs jisiŋ toːrəm, notiŋ toːrəm uːnti-pəl, ti sʲirəl eːləm-xoləs pusən alijanən.” aːɣit paːlt juː sʲaltsiɣ, xoːtəl-eːkʷa tari-peːsʲ-nʲimaːlʲe-sow naːj-waːpsiɣ uːnttəste, oːtər-waːpsiɣ uːnttəste. waːpse laːwi: “ti joli toːrəmt oːlnə maː-xum manəriɣ akʷ-muːs sam paːlt, suːp paːlt?” xoːtəl-eːkʷa laːwi: “ta xurip pus kit sampa maː-xum ta, ta xurip joməs suːppa maː-xum ta; naŋ lʲalʲtən ke sunseɣət, saman xotəl lapi?” taːri-peːsʲ-nʲimaːlʲe-sow ti minuŋkʷə pats. xoːtəl-eːkʷa laːwi: “juːlʲə minnən porat am aːɣim, eːt-pos-aːɣi xaːŋxəltəp-tittə ke xoːntiaɣən: ta xoːntiaɣən; at ke xoːntijaɣən: at ta xoːntijaɣən.” neːte xulʲtəs, takʷi xaːŋxəltəp xosit jol ta waɣləs, jola joxts. luwe teːtal ta kanʲsʲim; luwe aːtʲim, nʲowlʲe aːtʲim. lili-eːpəl puːlasəste: moːlal manər luː oːls, usʲ ta joməs luwiɣ jeːmts; akʷ nʲol-sam-asenəl sultməl paːjəlti, akʷ nʲol-sam-asenəl posiməl paːjəlti. luwe sisən taːləs, oːs ta eːlalʲ nʲowmats; minnə tul, xajtnə tul xalən teːliɣtawəs.

21.

xosa minəs, waːtʲi minəs, akʷ-mat-eːrt toːrəm jol xannə maːn asiŋ aːxʷtəsnə ta joxts. asiŋ aːxʷtəs saːt-pis keːr-patasəl xartimə . keːr-xortxən-sowen sʲaltəs. anʲ patəs uːrnə oːjka laːwi: “ejja tari-peːsʲ-nʲimaːlʲe-sow! maː janitəl osʲmarlasən, osʲmarlasən; am keːr-patsəm-taːra ke mineɣən, oːs keːr-xuːlpəmt xujeɣən.” tari-peːsʲ-nʲimaːlʲe-sow sunsi: rus keːr akʷ sam oːnʲsʲi, tiːɣlnəl akʷaɣ nʲuːpisʲ keːrəl waːrimə. tiːɣl aːtiɣtaxts, rus keːr-samnəl tuːlʲə tuːp pats; markaɣe jaxtuwəsiɣ, tuːl witən ta pats. anʲ oːjka laːwi: “keːr-xuːlpanəm iŋ oːleɣət; keːr-patsəm taːra minasən, keːr-xuːlpəmt naŋən akʷ ti puːwiləm.” anʲ keːr-xuːlpət sunsi: rus keːr akʷ sam, tiːɣlnəl akʷaɣ nʲuːpisʲ keːrəl waːrimə. witnə patəm oːrmet keːr maːnʲ sort xuril eːlalʲ ta ujmiɣts. jaləs, jaləs, anʲ rus keːr-samnəl kʷoss aːtiɣtaxtiɣls, tuːlʲə at pats, tot ta puːwwəs. oːjkate laːwi: “am juːniɣtiləm” ; eːkʷate laːwi: “am juːniɣtiləm.” eːkʷaten maːnʲ sort puːwawə, oːjkaten keːr-sʲaːkəl ti juːniɣtuŋkʷə patwəs. oːjkate laːwi: “taːkisʲ puːweln!” keːrsʲaːkəl kʷoss juːniɣti: anʲ maːnʲ sort eːlalʲ nʲowmats, anʲ eːkʷa kaːt-luwe supiɣ juːniɣtawəs. eːkʷa lʲawti: “am moːnt laːweɣəm: am juːniɣtiləm; anʲ oːs puːweln, am juːniɣtiləm!” oːjka ti puːwəste, eːkʷate pus kaːtetəl juniɣtite. maːnʲ sort eːlalʲ saːŋxwesəs, oːjka kaːte supiɣ xoːjwəs. saːŋxwasame muːs maːnʲ sort ta minəs, tuːlʲə pats.

22.

anʲ tari-peːsʲ-nʲimaːlʲe-sow maːnʲ-lunt-xuril mortim toːrəm nuːpəl tiɣlamləs. mortim eːkʷaɣ oːjkaɣ kʷolən ta joxtəs. lunt-sow xot-leɣmatəste, juː sʲalti. eːkʷaɣ-oːjkaɣ uːnleɣ. laːweɣ: “moːt toːrəm paːlt laːwəltawən, tari-peːsʲ-nʲimaːle-sow, man totn-utən totwesən, man aːləntən-utən aːlentawesən?” – “oːlnə eːləm-xoləs akʷ-mat maːn xuːnʲ joxti?!” mortim eːkʷa kʷona kʷaːləs, kit liliŋ pirwa puːwmatəm; juː tuːlsaɣe, aləsaɣe, nal-peːtsaɣe. tari-peːsʲ-nʲimaːlʲe-sow teːsaɣe, aːstəs. anʲ eːkʷa lu-sakwanə kʷona kʷaːltsane, liliŋ witəp tuːr-woːŋxan rawtasəsane: pirwaɣ roːŋximə eːl-tiːɣləmləsiɣ. mortim eːkʷaɣ-oːjkaɣ laːweɣ: “tari-peːsʲ-nʲimaːlʲe-sow kʷon kʷaːlakən; matəriɣ pireɣən: ta pireɣən; at ke pireɣən: naŋ kaːsən.” tari-peːsʲ-nʲimaːlʲe-sow kʷon-minəs, kʷol poːxeːn sunsi: akʷ maːnʲ kʷolkʷə; tuː juː sʲaltəs. maːnʲ kʷol-kiwərtə anʲ-manʲ neː lipəsʲ puŋkəl uːnli; saɣaɣe xot-taːrəmtamə, lʲilʲpəliɣ usʲ ti saɣite; saːnse jaːrmakəl pantimə, anʲ jaːrmak joli paːle ness leːntɣi. tari-peːsʲ-nʲimaːlʲe-sow laːwi: “maːte xosa maː ta jisəm; am nomseɣəm toriŋ mat neː xoːnteɣəm; saːt saːŋki saɣpanə, saːt owləx saɣpanə laːwəlteɣəm; xoːntiləm: neː-mat saːŋki aːtʲim, neː-mat owləx aːtʲim, saːnse osʲal-nʲawraməl ness nʲawsi.” anʲ jaːrmak xot-nujəmtawəs; saːt saːŋki, saːt owləx eːlalʲ tiːɣləmlast; anʲ same, paːlʲe tiːɣ kʷonsawət, tuː kʷonsawət. neːte nuːpəl laːwi: “towli, jol puːwen! samaɣəm, palʲaɣəm polʲiɣ ti kʷonsaweɣ.” akʷ poːxən uːntsiɣ, anʲilaxtsiɣ, sipiɣxatsiɣ. aːɣi xumit nuːpəl laːwi: “minən aːsʲaɣəm-sʲaːnʲaɣəm paːlt; akʷ sorniŋ lunt-sow, akʷ sorniŋ xotaŋ-sow woss miːɣiɣ!” tari-peːsʲ-nʲimaːlʲe-sow eːkʷaɣ-oːjkaɣ paːlt ta minəs, laːwi: “akʷ sorniŋ lunt-sow, akʷ sorniŋ xotaŋ-sow majeːn!” puŋk taːratimə ness uːnleɣ. oːjka puŋke noːŋx almejəs, waːpse akʷ sorni-lunt-sowəl, akʷ sorni-xotaŋ-sowəl majwəs. takʷi sorniŋ lunt-sowən sʲaltəs, neːte sorniŋ xotaŋ-sowən sʲaltəs. mortim eːkʷaɣ-oːjkaɣ laːweɣ: “aːɣijaɣəm, waːpsaɣəm! eːləm-xoləs jisiŋ toːrəm uːntxati, eːləm-xoləs notiŋ toːrəm uːntxati, ti lunte-waːse aːɣimeːn suːsasiɣ ti sʲoːpitəsləmeːn; xonal akʷ xumiteːn patnə mos, akʷ neːteːn patnə mos woss teːwə, ul woss xoːli!” anʲ anʲilawəsiɣ, sipxiɣlawəsiɣ, eːlalʲ ta tiːɣləmləsiɣ. anʲ lunt-waːs teːn jui-paːleːnt ta oːltxatsət. anʲ asiŋ aːxʷtəs taːre ti paːl toːrəmnə ta joxtsiɣ. tari-peːsʲ-nʲimaːlʲe-sow luwe tit ti xoːntəste; akʷaɣ ta kanʲsʲəm, luwe aːtʲim, nʲowlʲe aːtʲim. lili-eːpəl puːlasəste; moːlal manər luː oːls, usʲ ta joməs luwiɣ jeːmts.

23.

anʲ tari-peːsʲ-nʲimaːlʲe-sow lunt-xuril luwe sisən ta isəs, neːte towləl mini. xaːnxəltəp titən joxteɣ, xoːtəl-eːkʷa-aːɣi, eːt-pos-aːɣi tot luwiŋ aːnasəl, misiŋ aːnasəl eːlalʲ nʲowəmtəsiɣ. xosa minast, waːtʲi minast, sʲaːrisʲ-kʷotʲl-wit-xoːn uːs-aːwi poːsxats, wit-xoːn-aːɣi tuːl kʷon neːɣləs. eːlalʲ nʲowəmtast. tan paːlanəlt wit-xule, lunte-waːse owtnə wit xojtəl ness owteɣət, ness nʲoːriɣleɣət. xosa minast, waːtʲi minast takʷi uːsen ta joxtast. sʲaːnʲaɣe-aːsʲaɣe nuːpəl akʷan lakʷsət; anʲilaxtsət, sipiɣxatsət. ta xurip uːs ta teːləs: minnə tul silim uːnli, xajtnə tul silim uːnli. liliŋ sorni owmiŋ kʷol uːntxats, liliŋ sorni owmiŋ uːs uːntxats. nʲoxs xantal akʷ lʲeːŋk aːtʲim, uj xantal akʷ lʲeːŋk aːtʲim. soriŋ teːp, maːɣiŋ teːp pasan waːrwəs; teːst, ajsət. teːnanl, ajanl xalt sʲaːnʲe laːwi: “xoːnal eːləm-xoləs jisiŋ toːrəm uːntxati, eːləm-xoləs notiŋ toːrəm uːntxati; sawiŋ saːxip saw neː, sawiŋ saːxip saw xum uːnlənə xotalʲ oːlnə naːjiŋ saːmnə, xotalʲ oːlnə oːtəriŋ saːmnə aːnʲtiŋ xaːr jirəl tuːsʲtawən, toxxiŋ xaːr jirəl tuːsʲtawən!” anʲ kʷolanəlt puŋke same manʲiɣtəste, xoːt neːte jot jol ta xujəs. xolitan noːŋx sajkaləs, kaːte nariɣtəs; reːɣiŋ maːn xoːjəs, laɣle nariɣtəs: reːɣiŋ maːn xoːjəs. sʲaːnʲaɣe-aːsʲaɣe taw paːlt sʲaltsiɣ, sʲaːnʲe laːwi: “naŋ piːɣkʷə! joli toːrəmt ta oːleɣən, numi toːrəmnə meːn ta minəsəmeːn. xonal eːləm-xoləs jisiŋ toːrəm uːntxati, eːləm-xoləs notiŋ toːrəm uːntxati; joli toːrəmt naŋ mir-susnə-xummiɣ oːlən, aːsʲən numi toːrəmt numi-toːrmiɣ woss oːli, am kaltəsʲiɣ oːleɣəm.” xuːrəm maːnə ta minast. ta sʲunʲanəlt, ta xoːlanəlt anʲ oːleɣət, anʲ ta sʲunʲeɣət.

Imprint - Privacy Disclaimer - Contact
Last update: 17-02-2022 - Visitors: